عذرا لكى يابلدى لما حدث بكليتى

بالأمس كان يوم فى شدة الغرابه بكلية الهندسه بجامعة الزقازيق

فى البدايه كان احتفال أسرة النور بالكليه بمناسبة مرور 25 عام على تأسيسها

وهذا الرابط
http://sharkawyonline.net/sharkawy/sh/po/posts.php?toid=680

ومثل كل مره ومثل كل حفل محترم تعرض له ضباط الأمن للتضييق وإفشال الحفل

ورأينا بلطجيه من كليات أخرى وقد ملأوا المكان وأحضروا سماعات وعلو الأصوات

حتى تغطى على صوت الحفل المحترم..وطبعا الراعى الرسمى لهم رجال الأمن

والكل يشهد على تواجدهم بجوارهم دون أدنى رد فعل ....

المهم انتهى حفل اسرة النور وغادرت المكان وأكيد بصعوبه بالغه فوجدنا فور محاولتهم

الخروج اندفاع من الطلاب نحوهم وماشابه ذلك ثم بعد ذلك ارتفعت الأصوات

ورأينا البلطجيه الذين أحضروا الدى جى وقد أحضروا العصى والشوم وانهالوا بالضرب

لانعرف على من.... ثم رأينا نارا كبيره التهمت السماعات الخاصه بهم .

عرفنا بعد ذلك أن اسرة النور خرجت من قبل اى مشاكل او اندلاع اى نيران..

وماحدث بعد ذلك انما هو مشادات كلاميه بين أحد الدكاتره بالكليه والذى لم

يعجبه الأمر فخرج لطلب تهدئة صوت السماعات فتطاول عليه أحد البلطجيه

فدافع طلاب كلية الهندسه عن الدكتور وأحرقوا الدى جى للبلطجيه وزادت المشادات

إلى أن أصيب بعض الأشخاص بجروح...

فى مقالى هذا أعتذر لكى يابلدى عما حدث اليوم بكليتى...

أعتذر عن تواطؤ رجال الأمن عن حل المشكله فمع استنجادنا بأحدهم رد قائلا

"طلاب فى بعض خليهم يموتوا بعض"

أعتذر عن انتهاك حرمة الحرم الجامعى فى ظل هذا العصر الذى نعيشه.

أعتذر لكى عن مايفعله المسئولين فيكى وعن صورتك اللى شُوهت فى كل الدنيا بسببهم

أعتذر لكى لأن اسمك من أغلى الاسماء فقد ذكر فى أطهر الكتب وإنه ليعز على

أن أراه دائما فى الصحف العالميه ومراكز حقوق الانسان فى أسوأ الأوصاف .

عذرا لكى يابلدى فالمعركه الآن لم تصبح لرفعتك إنما أصبحت معركه شخصيه تم

فيها تجاهلك وتجاهل أولادك..

اعتذر لكى أيضا ياجامعتى وياكليتى فوالله ماحدث اليوم قد أخذ نصيبا من دموعى

حزنا على حال الطلاب والمستوى الذى انحدر إليه مكان العلم...

فلو تأملتم المنظر لحزنتم _ عشرات الطلاب فى اشتباكات بالعصى والمطاوى

ومئات الطلاب خارج المحاضرات يشاهدون ولايوجد أى سلطه تمنع مايحدث

حتى الدكاتره أهينوا ... فأينك ياعميد كليتنا؟؟؟؟

أعتذر عن الانحدار الذى نصل إليه كلما زاد الوقت...

يابلدى إن هناك شبابا وشابات يأملون أن يضحوا بالأرواح فى سبيل رفعتك

وفى المقابل هناك أشخاص متملكين مستعدين لقتل الأرواح فى سبيل اهانتك(قبحهم الله)

ومع ذلك سنظل على أمل أن نفقد أرواحنا ولكن لابد أن يكون الثمن نهضتك..

فهل يكفى هذا اعتذارا؟؟؟؟؟؟؟؟؟؟؟؟؟

ولى كلمه موجهه لكم يارجال الأمن:

إنكم لاتحاربوننا إنما تحاربون منهج الله عز وجل ....

وماحدث اليوم ماهو إلا بيان لكم تعرفوا أن هناك قوه أكبر فوق الجميع لايقدر

عليها جاه ولا سلطه "ويمكرون ويمكر الله والله خير الماكرين"

ولتعلموا أيضا أن المئات قد انطلقت بالدعاء عليكم اليوم ودعوة المظلوم ليس

بينها وبين الله حجاب..فافعلوا ماتشاءون واتنظروا رد الله.

ـــــــــــــــــــــــــــــ
دمتم بخير

اتشطبت من الاتحاد لحسن السير والسلوك

امتلأت الاسبوع السابق ساحات الجامعه بأوراق دعوه لترشيح لاتحاد الطلاب

وأول ماسمعنا الخبر انفرجت أساريرنا وطرنا فرحا ...ليه بقى؟؟؟ عشان بس

عرفنا ميعاد الترشيح للاتحاد...امال لو اترشحنا هنعمل ايه..نموت من الفرحه؟؟

المهم اتلخبطنا ودوخنا عشان نجهز الطلبات اللى المفروض تكون جاهزه وقت

الترشيح..صورتين ودمغه مشموجوده فى الكليه اصلا ورحنا كليه تانيه نجيبها

ووصل المصاريف واللى موظف الشئون مشراضى يسجله...المهم أتمم

البعض أوراقه وأنجزها وأصبحت جاهزه بعد عناااااء وتعب وترك محاضرات

عشان تخلص..

وجه اليوم اللى كلنا مستنيينه......عاوزين طلبات الترشيح...

كتبنا المعلومات المطلوبه واستلمنا طلبات الترشيح ... وكل هذا فى ظل تواجد

رجال الأمن...الحمد لله مسبوناش لحظه منتظرين طوال الوقت أمام باب رعاية الشباب.

المهم ملينا الورق ورحنا عشان نختمه من الشئون.الموظف يرفض ويقول لازم موظف

رعاية الشباب يمضى الاول ... نذهب لرعاية الشباب:لأ مش لازم روحوا انتو بس واحنا

هنكلمه...وأخذنا الكليه ذهابا وإيابا حاملين رسالات من وإلى موظفى الشئون والرعايه..

وبفضل الله وصل المدير وقالهم امضولهم الورق....اللى يضحك بقى ان الموظفين مشعارفين

يختموا فين ولاعارفين الورق بيخلص ازاى..(شىء طبيعى ماهو الأمر غريب عليهم

مشمتعودين على استمارات ترشيح لاتحاد الطلاب...مبتمرش عليهم كتير ويمكن سنين)

وختمنا الورق ووديناه الرعايه وأخدنا نفس عميق من الروتين الحكومى الممل ...

ثم ملأنا الأمل لمدة يومين لحين ظهور النتيجه يوم الأحد....

-لوسمحت ممكن اشوف قوائم الترشيح؟؟؟(هى المفروض تتعلق أصلا)

-لا مشدلوقتى خاااالص تعالى آخر النهار.
-طب أنا حضرتك هخلص بدرى.
-خلاص انا اعمل ايه.
-وصلت القوائم الحمد لله وشفناها الساعه واحده...وصلت القوائم منين بقى؟؟؟؟ متعرفش

طب بقية القوائم موصلتش معاها ليه؟؟؟متعرفش...لاعليها ختم ولا عليها امضاء ولا شىء

ورق مكتوب بخط الايد (بينى وبينكم يعنى خط عمو وعمو اللى كانوا قاعدين قدام باب الرعايه

يوم الترشيح...أصل انا شفتهم تانى يوم وهما بيطبخوها)

انا بقى قريت الورق وجالى هيستريا ضحك .... فيما يقرب من 6 ورقات

كلهم غير مقبول ...لم يسدد المصروفات...لايمارس النشاط (من كتر الكلمه ماهى متكرره

مبيكتبهاش... فى كل اسم كاتبها مره واحده فوق وبعد كده كل الصفح علامة تكرااار)

ولو دورت هتلاقى فى ناس دافعه المصروفات ومكتوب قدامها لايسدد

طب ازاى قبلوا منه الورق من غير وصل مصاريف أصلا؟؟؟؟ حاجه تجنن

وفى ناس عندها نشاط وبرده اسمهم من الممنوعين....طب وبعدين ايه الحل؟؟؟

سألت سؤال واحد بس .. أنا ليه اسمى مشموجود واترفض ليه؟؟؟؟

لسه واحد حب يرد عليه قام قاطعه واحد تانى وقاله بص ياعم أنا عارفها دى بشمهندسه

ومشهتعرف ترضيها بكلمتين ولاتلف عليها...من الآخر يابشمهندسه الجامعه مشعاوزاكم..

وبعد فترة نقاش كاد فيها الموظف أن يخرج عن اللوائح ويتعاطف معنا...قاللى

من الآخر احنا ملناش ذنب اذا كان مخترناش الريس ولا اعضاء مجلس الشعب...

سيبكم بقى من اللى فوق ده كله............

الجامعه مشعاوزه طلاب محترمين مؤدبين؟؟؟

بيخدموا الطلاب والطالبات والكل يشهد بأنهم الأكثر تواجدا والأكثر خدمه لهم

ده ان افتكروا اساسا ان فى حد غيرهم اللى بيخدمهم...وبدون مقابل فقط لوجه لله..

الجامعه مشعاوزه طلاب واعيين مثقفين؟؟؟

بأى حق الجامعه متعوزناش أساسا...بصفة انها صوت الطالب؟؟؟

ولابصفة ان اللى بيدلى صوته فى الانتخابات هو الأمن وليس الطلاب؟؟؟

يرضى من أن يضعوا قوانين ولوائح تعجيزيه لكل من يريد أن يترشح للاتحاد

ويسهلوا الأمور لمن يريدون هم؟؟؟؟

أمن طرق تربية الطلاب فى الجامعه كبت الطموح وكبت الحريات ودفن المواهب؟؟؟؟

لا ولم يقف الأمر عند ذلك فلابد أن يلى ذلك إلغاء الهويه وسحب رخصة الدين من كل شى

وقتل الشخصيه والانتماء والانسياق والتسلق وراء الآخرين..

أهذا ماتريد جامعتنا أن تربيه فى الطلاب؟؟؟؟؟

أم أن المصلحه الشخصيه أصبحت غالبه على مصلحة البلاد وانحرقوا الطلاب؟؟؟؟

كيف تريد من طلاب لم يتربوا على حرية الرأى والتعبير وتقبل الرأى المخالف أن يقودوا أمه؟؟؟

أن يُطلق عليهم (شباب المستقبل)؟؟؟

بتربى الطالب على الديكتاتوريه وان راى اللى أعلى منه هو اللى هيمشى.

ازاى عاوزه يربى ولاده على الديموقراطيه بعد كده .....

وخد عندك بقى جيل ملوش شخصيه مبيتحملش مسئوليه وسميه أمل الأمه..!!!!!

لما ندخل الكليه ونقضى فيها خمس سنين ومنحققش فيها طموحنا ومنستغلش فيها طاقاتنا

هنستغلها فيييييين؟؟؟؟؟وامتى؟؟؟؟؟؟

هتجيب وقت فاضى منين وقوه وشباب زى الفتره دى؟؟؟؟

بجد..

حسبى الله ونعم الوكيل
آيه تريح كل مظلوم...
قال تعالى:
إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا وَإِنْ يَسْتَغِيثُوا يُغَاثُوا بِمَاءٍ كَالْمُهْلِ يَشْوِي الْوُجُوهَ بِئْسَ الشَّرَابُ وَسَاءَتْ مُرْتَفَقًا" الكهف :29
صدق الله العظيم

فقط بقى عشره

من أسبوع مر على يوم شبيه باليوم لذى وُلدت فيه ولم

يسعفنى الوقت لأكتب موضوعى عنه إلا الآن....

أغرب مافى الموضوع أنى لم أكن سعيده كما تخيل كل

الناس اللى كلمونى_ رغم أنه أول مره يحدثنى كل هؤلاء الناس

فقد اتممت عشرون عاما..

رقم جميل مشكده؟؟؟؟

لم أكن سعيده ......ليس تخوفاً من ذلك السؤال الشهير عندما يسألك أحد عن

سنك فتقولى 20 عاما..

فيسأل: عشرين عشرين ؟؟؟ ولا عشرين من بتاع البنات؟؟؟؟؟؟؟

ولا خوفا من مرور تلك السنوات القليله القادمه ثم تدخل فى

الثلاثين..

إنما لأنه انقضى من عمرى الحقيقى 4 أعوام...

من بعد سن 16 عام حتى الآن انقضى 4 أعوام من فترة الشباب الفعليه

ماذا فعلت فيهم وماذا قدمت وهل انجزت وماذا اهدرت وهلى سأقضى العشره

القادمه ايضا بنفس البطء الذى قضيت به الاربعة اعوام الماضيه..

فى هذا اليوم كانت هناك كلمه تتردد فى ذهنى دائما:

لم يبقى إلا عشرة أعوام_انقضى اربعه انقضى اربعه.

وذهبت الى كتبى الدراسيه والثقافيه ونظرت اليها وظللت ابكى...

اهذا هو العدد فقط؟؟؟؟

وتسلل الى نفسى بعض اليأس عن أن احقق شىء عظيم فى فترة شبابى

مثل الامام العظيم حسن البنا..ولكن سرعان ماسترددت قوتى

وعزمت على حياه أفضل وعزيمه أقوى..

أسألكم الدعاء...

ولينظر كل منا كم بقى له 10 أم 5 أعوام أم سنه واحده؟؟؟؟

تحديث:

على فكره انا اتبسطت فى اليوم ده كتير

كنت اقصد ان كنت مبسوطه عشان الناس اللى سمعت

صوتهم والناس اللى شفتهم والجو الجميل اللى عملوه

مش عشان اتممت عشرين سنه..

لحسن الناس يفتكروا ان اليوم كان حزين_أنا فقط اسرد

النقاط الهامه.


أشكركم

دمتم بخير